Return to site

Ippassaq nunat allat pillugit oqalugiaatera

Illersornissamut politikki - Inatsisartuni Nunanut allanut sillimaniarnermullu ataatsimiitsitaliaq sinnerlugu oqalugiaatera

Illersornissamut nunanullu allanut politikip qanoq ilusilersorneqarnissaa oqallisigineqaleraangat ilaatigut isumaqarnartarpoq Kalaallit Nunaata qanoq oqaaseqarnissaa ujartorneqarnanilu tusarniarneqarneq ajortoq. Allaalluunniit Kalaallit Nunaata akuersaarnissaa taamaattussaannartut isigineqartartoq.

Taama oqarnera ima paasineqassanngilaq Kalaallit Nunaata arlaatigut itigartitsisinnaatitaanissaa ujartoriga. Kalaallilli Nunaat tusarneqarnissaminut pisinnaatitaaffeqarpoq.

Pisut ilaanni isumaqatigiinngissinnaasarpugut. Soorlu taamaappoq Pituffik pillugu suliami. Tamannali tamat oqartussaaqataanerannut aammalu tamat oqartussaaqataaneranni maleruagassanut ilaaginnarpoq, tamatumanilu isumaqatiginninniarnerit oqallinnerillu tunngavigalugit ataatsimut aaqqiissuteqartoqartarpoq naaperiaassuteqartoqartarlunilu.

Inerneri pitsaasuinnaaneq ajorput. Taamaattariaqarporli. Tamatta ataatsimooqatigiinnermi ilaavugut, ataatsimooqatigiinnerullu siunissami atuunnissaani nunat ataasiakkaat (Danmark, Kalaallit Nunaat Savalimmiullu) suleqatigiinnermi qanoq inissisimanerminnik paasinninnerat soorunami apeqqutaassalluni.

Unneqqarilluta oqartariaqarpugut Danmarkip Issittumi ilaaneranut inissisimaneranullu Kalaallit Nunaat pissutaalluinnarmat

Illersornissamut isumaqatigiissuteqarnissaq Issittuinnarmut soorunami tunngassuteqanngilaq.

Miserratigissanngilaralu Issittoq Kalaallillu Nunaat illersornissamik politikikkut suliniutini isumaliutersuutinilu ukiuni kingullerni annertunerujartuinnartumik ilaatinneqartalermata. Assersuutigalugu illersornissaq pillugu kingullermik isumaqatigiissuteqarnermi (2013-2017-imut) Issittoq ineriartortinneqartussat ilaattut toqqarneqarpoq.

Oqaatigiumasara unaavoq: Suleqatigiinnissamut pikkorinnerusariaqarput. Kalaallit Folketingimut ilaasortaatitaat oqaasissaqartitaalerlik. Aammalu illersornissamut politikip ilaanut uatsinnut toqqaannartumik attuummassuteqartumut Kalaallit Nunaat sunneeqataassuseqalersinneqarli.

Ataatsimoorfigisinnaasagut amerlaqaat

- siunissami aaqqiagiinnginnerit pinngitsoortinniarlugit Issittumi akerleriissutaasinnaasut minnerpaaffianniitinneqarnissaat

- Issittumi innuttaasunut ineriartornermik pilersitsiviusumik periarfissat atorluarneqarnissaat siuarsarneqarnissaallu. Tamatumani inuuniarnikkut, aningaasaqarnikkut avatangiisitigullu pissutsit eqqarsaatigineqarput.

Ineriartortitsinerli unammilligassanik aamma nassataqartarpoq. Unammiligassat iliuuseqarfigineqartariaqartut aammalu maannangaaq pilersaarusiorneqartariaqartut eqqumaffigineqartariaqartullu.

Assersuutigalugu Issittumi umiarsuarmik angallanneq annertuseriarujussuarpoq. Taamaattoqarneralu ukiuni aggersuni allanngussasoq naatsorsuutigineqarsinnaanngilaq. Allaallumi silap pissusaa allanngoriartorpoq, taamaalillunilu usinik angallassineq aamma pisariinneruleriartorluni. Tamatuma peqatigisaanik umiarsuit takornariartaatsit amerleriarput.

Taamaattoqarnera nakkutilliinissamik pisariaqalersitsivoq. Angallanneq nakkutigineqartariaqarpoq ingerlaarfiillu pitsaanerusumik nalunaarsorlugit assiliorneqartariaqarput.

Oqariaaseqarpoq imaattumik: Pitsaanerpaamik neriuuteqarit – ajornerpaamilli pisoqarsinnaanera naatsorsuutigiuk.

Ajutoortoqartillugu aatsaat iliuuseqartoqarniartarnera iluaqutaanngilaq. Siumut isigisumik eqqarsartariaqarpugut.

Tamatumanilu ilaatigut illersornissamut isumaqatiginninniarnerit aqqutissaapput

Illersornissamut isumaqatigiissutip ilaatut SAR-imik upalungaarsimanissap pitsaasup sunniuteqartullu pilersinneqarnissaa qulakkeertariaqarparput. Umiarsuit imminnut apornerisigut, umiusoqarneratigut uuliarlueertoqarneratigulluunniit ajutoornerit pinngisaannartussatut tamatta neriuutigisagut ajoraluartumilli takkuteriasaarsinnaasut iliuuseqarfigisinnaajumallugit upalungaarsimanermik pilersitsissaagut.

Tamanna sulissutigilereerparput qularnanngilarli pitsaanerusumik sulissutigisinnaagipput

Annertunerusumik oqaaseqassanngilanga. Ullumi aaqqissuussinermi peqataasinnaagama assut nuannaarutigaara oqallinnermilu peqataanissara qilanaaralugu.

Qujanaq.

All Posts
×

Almost done…

We just sent you an email. Please click the link in the email to confirm your subscription!

OKSubscriptions powered by Strikingly